١٨‏/١١‏/٢٠٠٧

كرسي الاعتراف

السلام عليكم ورحمة الله وبركاته
غبت عنكم كتير ... لكن رجعتلكم ومعايا حكاية حصلت معايا .. وبتحصل تقريبا في كل بيت
اقروا معايا وقولولي رأيكم .. بس بعد ماتقولوا ...
بسم الله الرحمن الرحيم ...
ــــــــــــــــــــــــــــــــ

ايه رأيك لو حد قعدك على كرسي وأقنعك إنك دلوقتي حالا على كرسي الاعتراف

وانك من غير ماتحس ح تلاقي نفسك بتدلدأ بالكلام ،
حتى لو انت مش عايز تتكلم وحتى لو حاولت تمنع نفسك ..
مش ح تقدر !!!

اديني عقلك شوية وخدو تاني ...

آآآآآآه .. ح تقول البنت دي بدأت تهتش ..

أمال لما تسمع اللي جاي ح تقول ايه ..

مش أنا قعدت عليه .. بجد قعدت على كرسي الاعتراف

ايه الحكاية وجات إزاي !! ماأنا جاية لكم ف الكلام أهوه

أكيد طبعاً كلكو كدبتوا ولو مرة ف يوم من الأيام .. وخصوصاً وانتو صغيرين ..

أنا بأه كنت حريفة كدب خايبة أوي .. ويظهر الحكاية دي كانت غايظة ماما وقلقاها
لأ مش قلقانة اني خايبة ف الكدب .. قلقانة اني بكدب من اصلو ..
بس طبعاً مش ح تغلب لأن مامتي ماعندهاش فعلاً مستحيل ..

المهم ياجماعة ف يوم من الأيام كان عندي تقريباً يمكن أقل من خمس سنين ،
بابا وماما كانوا بيروحو يشتروا طلبات البيت مرة كل اسبوعين ..
وأنا وأختي التوأم .. كانوا دايما بياخدونا معاهم لما بيكون الجو كويس ..
لكن لما بيكون حر .. بيخافو علينا ف بيسيبونا في البيت ..

toy story المهم اختي ومانيل قعدو يتفرجو على فيلم
للمرة ال.... تاشر ...

.... مش فاكرة الكام .... وأنا كنت مليت منو .
قلت أدعبسلي على حاجة تسليني ..
وبصراحة أنا كنت منظرة على العملة السودا دي من فترة بس كنت مستنية الفرصة .

اتسحبت على أوضة ماما .. وأنا كنت بموت ف المرايا بتاعة التسريحة لانها كبيرة أوي ..

طلعت ع الكرسي بتاع التسريحة .. واستعنت ع الشقا بالله ..
ومديت ايدي فتحت علبة كبيرة أوي ماما كانت حاطة فيها ألوان جميلة وتجنن ..

من كل لون في أقلام كتير أوي طرية وجميلة وركناهم لا هي بتلون بيهم ولا هي سايبانا احنا نلون ..

المهم أنا عارفة انها حاجات بتتحط ع الوش ... بس مايمنعش يعني اني أجربها ع المراية ..
قبل كده جربت واحد منهم ع الورق وكان جميل أوي ..
رسمت بيه وردة حمرا بس يظهر الورقة كانت صغيورة عليه .. أنا قلت المرايا كبيرة .. وح تساع ..
وأمسحوا ولا من شاف ولا من دري .. المهم ...

قعدت أرسم ف ورد وعملت جنينة كبيرة أوي ورسمت كمان فيها شجر ..ورسمت شمس تحفة ةةةةةة
ولا المركب اللي رسمتو ولونت البحر تحتيه وجيت أرسمني وانا راكبة جواه .....

سمعت صوت المفتاح ف الباب وماما وبابا جايين ..
قلبت الاقلام والعلب الصغيورة المفتفتة .. جوا العلبة الكبيرة .. ورحت طافية النور بتاع الأوضة ..
وخرجت قعدت جنب أختي ولا من شاف ولا من دري ..

دخلت ماما .. لقت إيدي ملطخة اشي أحمر وأزرق وموف وفوشيا وحاجات غريبة .. قالتلي إيه ياهايدي ده ..
ايه اللي موسخ ايدك .. كشيت ايديا ف بعضيهم ورا ظهري وافتكرت انو خلاص لما عملت كده هي ح تبطل تشوفهم ..

دخلت هي الأوضة بتاعتها .. وأنا دخلت جوا التلفزيون آل يعني بأتفرج ومشغولة ومش فاضية لحد ...
ولحظة وسمعت حاجات أنا متوقعة شوية منهم .. أصل زمان ماما لما كان حد مننا يعمل عملاته السودة
ماكناش نسمع إلا جملتين مافيش غيرهم .. يالهوي ىىىىىى حرام عليكم ... حرام عليكم ....... وبسسسسسس

وبعد دقيقتين نلقاها راقت وقعدت تتكلم معانا .. وليه ياحبيبي تعملي كده .. كده غلط .. كده ... كده ....

المهم أنا طبعا كنت متوقعة أسمع .. يالهوي ىىىىى بس المرة دي سمعت كمان معاهم ... حسبي الله .. حسبي الله

مين فيكو عملت العملة السودا دي ؟

طبعاً أنا بريئة ولا كأني هنا ... أمي تسأل .. وأنا أرد بمنتهى الهدوء .. أنا والله ماعملت حاجة .. ولا اتحركت من مكاني من ساعة ماخرجتو ده انا كنت بتفرج على ( باز .. باااااااز ) ..

وأختي طبعاً مااقولكوش عليها أصلنا مدمنين أفلام كارتون لحد الآن ... فطبعاً لما بنشغل فيلم بندخل جوا التلفزيون وننفصل عن أي حاجة تانية حوالينا ..

فأختي ... كمان بتحلف بس بحرقة أوي ... وانا بتكلم بهدوء وبراءة ... راحت ماما .. بصتلي كتير أوي ... حسيت كأنها ح تخنقني ....

..وبعدين ... دخلت أوضيتها وبعدين المطبخ .. وافتكرتها خلاص نسيت وخلصت الحدوتة على كده ...

لقيتها جاية بعد شوية كده .. ونادت علينا أنا وأختي وجابتنا وشاورت على كرسي كبير أوي ... كانت حاطاه ف الصالة وبتحب تقعد عليه ..
تعرفوا هي لما كانت بتقعد عليه كانت بتغطس فيه .. فما بالكم بأه احنا لما نقعد عليه ..

المهم ... مسكتني من إيدي وقالتلي اقعدي ع الكرسي ده .. بس قبل ماتقعدي ياهايدي أنا عايزة أأولك حاجة مهمة أوي ... ببراءتي المعتادة ... حاجة ؟؟؟ حاجة ايه يامامتي ياحبيبتي ؟؟

... تعرفو ربنا ادى كل أم حاجة علشان تعرف بيها ولادها بيقولو الصدق ولا لا ... وعشان يتعلموه ومايكدبوش أبداً ف حياتهم .. علشان يفضل قلبهم ابيض .. مافيهوش ولا نقطة سودا ...

تعرفو ايه هي الحاجة دي ؟؟؟ احنا كنا بدينا نحس برهبة .... لان ماما لما بتيجي تكلمنا عن ربنا ... بتخلينا نحس كده بجو فيه رهبة ....

عارفين ايه هي الحاجة دي ىىىى ؟؟؟

ايه هي ياماما ؟؟

بالنسبة ليا أنا ...... الكرسي ده ..........

هي قالت كده وأنا ركبي سابت بس أختي سمر كانت أجمد مني شوية ...
راحت ضاحكة كده وقايلة لها ... ياسلالالالالام ... الكرسي ده ؟؟؟ آآآآآآآآه

ماما راحت قايللها .. أيوة .. أنا أقدر لو قعدتوا ادامي هنا ع الكرسي .. أعرف مين فيكو صادق ومين كداب ...
بس بشرط ... لازم تعرفوا حاجة مهمة أوي ....

ايه هههههه ؟؟ اللي ح يكدب منكو ربنا يأذيه لو مش دلوقتي حالاً يبقى كمان شوية أو بعدين ..
غير بأه كمان لما يروح عند ربنا سبحانه وتعالى .. يوم القيامة .. ح يحاسبو حساب عسير ...

أنا كنت اتجرأت شوية لما لقيت سمر مش مقتنعة ( بس يظهر لان انا اللي عاملة العملة دي ... ف ... )

المهم يعني .. ماما قالتلها ... طيب تحبوا اثبتلكم .. اقعدي ياهايدي على الكرسي ..
قعدت وأنا مصممة جوايا اكدب واشوف لو ماما ح تعرف ولا لأ ... سألتني ..
انتي ياهايدي اللي رسمتي الحاجات اللي جوا على المرايا ؟؟؟

جيت أأولها لأ .... ماما لحقتني وراحت قايلالي ايه ... خلي بالك لو كدبتي انتي حرة ف اللي ح يجرالك ...
اترعبت انا وخلصت ع الاخر ..

ورحت منفجرة ف العياط ... وقايلة لها .. آآآآآخررر مرة ياماما ..
مش ح ألعب ف حاجاتك تاني ومش ح أكدب تاني .. والله ياماما مش ح ةاكدب تاني ..

أختي شافتني كده .. اترعبت هي كمان وصدقنا فعلا حكاية الكرسي دي ...
وبقينا لما نمشي ف الصالة نمشي من بعيد عنه .. ماما سمته كرسي الاعتراف ..
لما كانت تسألنا عن حاجة ونسكت تقول طيب خلاص تعالو اقعدو ع كرسي الاعتراف ... تلاقينا ف لحظة كرينا الكلام ...

بس بعدها سمر سألتني هايدي هو انتي لما قعدتي ع الكرسي عرفتي ازاي ان ربنا بيبص عليكي ؟
ياعبيطة مش ماما دايما تقولنا ان ربنا سبحانه وتعالى بيشوفنا دايما واحنا مش بنشوفه ..

طيب هو يعني ماما كده مش بتكدب ابداً .. عشان كده بتحب تقعد ع الكرسي ده ... ومش بتخاف منو ؟؟؟

المهم لما كبرنا شوية .. وفهمنا حدوتة الكرسي ده ... قلنا لماما بس هو انتي كده مش كدبتي علينا ؟؟

قالت لنا ... أنا قلت ان ربنا بيدي الام حاجة تعرف بيها لو ولادها بيكدبو ولا لا .. وده حقيقي

وقلت لكم ان ربنا بيعاقب الكداب ان عاجلا او آجلا وده حقيقي ... أما حكاية الكرسي دي .. كانت مجرد حيلة عشان اعلمكم بيها ..
آه نسيت أأولكم دي كانت المرة اللي ماما حست فيها انو انا عندي موهبة الرسم فعلا لانو اول مرة ارسم حاجة كبيرة .. خلت الصورة اللي رسمتها فتر ة طويلة ومامسحتهاش من ع المرايا وقالتلي لما تنجحي ف سنة اولى ح اجيبلك علبة الوان كبيرة ... وفعلا جابتلي علبة ألوان فايبر كاسل كبيرة اوي .. من مكتبة مخصوصة للرسامين وكمان جابتلي اسكتشات رسم من بتاعة الرسامين .. خليتني احس اني رسامة بجد وكنت كل مااشخبط حاجة او ارسم رسمة تقولي ايه ... انتي ح تطلعي رسامة كبيرة ياهايدي ...


ـــــــــــــــــــــــــــ

ح تسألو ايه فكرني بالحكاية دي دلوقتي ؟؟

أأولكم ... شوفو بأه أنا عندي تلات اخوات بنات صغننين منهم اتنين توأم ... المهم ماما بتعلمهم يحافظو ع الصلاة ف وقتها ... وطبعا ده صعب جدا لأن الطفل مابيكونش واعي كويس لقيم ومعاني دينية كتيرة ...

المهم يعني ... ماما دايما تطلب مننا نساعدها في مراقبة اخواتي .. وتقول بس احنا نعودهم ع الصلاة وهما لما يوصلو عشر سنين ح تكون بقت عادة عندهم ومش ح يستغنو عنها ..

المهم اختي الصغنتوتة .. نادو .. ماما بتسألها اول امبارح ... صليتي الصبح يانادو؟؟؟... ايوة طبعا ياماما ...

ماما سكتت .. جت بالليل صليتي العشا يانادو ..؟؟ أيوة طبعا صليت ...

سمر راحت مفرقعة الاسفين اياه ولقيناها بتقوووووول ... ازاي ياماما بتسأليها .. أنا سألتها وقالتلي انها صلت مع حضرتك !!!!!

ونادو طبعا بدأت تفتح الزنانة بتاعتها .. انا صليت ... صللللللللليييييييتتتت ...

ماما ابتسمت الابتسامة اياها بتاعة زمان .. اللي كنا بنشوفها لما نكون عاملين عاملة .. وراحت قايلة لنا ... أأولكو يابنات أنا ح اريحكو كلكو ...

هاتوها على كرسي الاعتراف ودلوقتي كل حاجة تبان ... أنا وسمر كنا ح ننفجر م الضحك بس كتمنا اااااااااا ششششششش ..

و جات ماما عملت معاها نفس الفيلم ... وأهو من ساعتها ونادو بتصلي لوحدها ... الله اعلم ح تفضل على كده لحد امتى ... بس ربنا يديمها نعمة ..

ويخليلنا ماما ومايحرمناش أبداً من تفانين ماما ..

ولالالالالالا .... من ...... كرسي الاعتراف .....

ــــــــــــــــــــــــ
تحياتي ليكم ... وتصبحو على خير
هايدي
ــــــــــــــــ

هناك ٧٣ تعليقًا:

Mahmoud Emre يقول...

جامد الكرسى ده ..




الا هو مين النجار اللى عمله :d ؟؟



موضوع جميل وربنا يحسن خلقك وخلق أخواتك الصغيرين وخلقنا جميعاً ..

عصفور المدينة يقول...

السلام عليكم

أول زيارة لي لمدونتك وشكرا لك أن عرفتيني إليها

أعجبني جدا تعبير ندخل جوا التليفزيون


وبعدين مش عارف أولادي تمشي معاهم الحيل دي ولا لأ بس عندنا كرسي ينفع كدة وعندنا ألوان برضه مركونة تنفع كدة
:)

دكتور حر يقول...

لا بجد حكايات رائعه
طفوله بريئه

أسلوب قصصي رائع

أم مربيه متميزه

****************
كان ليا جده اخواتي الكبار عاشوا معاها
كانت بتعمل نفسها عفريت اسمه أنوووور

وتعمل كده مع اخواتي وتاخد منهم اي حاجه
وهم برضه كانوا مصدقين ومستسلمين

دمت بخير

غير معرف يقول...

اول زيارة للمدونة بس بجد تحفة ياهايدي :)

عجبتني اوي فكرة كرسي الاعتراف وعجبني اوي طريقة تصرف والدتك ربنا يبارك لكم فيها معاكم

بجد سعيدة جدا انى اتعرفت على المدونة وان شاء الله تكون من المدونات اللى اتابعها دايما :)

ربنا يبارك فيكِ وفي اخواتك وفي والدتك :)

البيروني يقول...

جامد الكرسي بس شكله مستورد
ما شاء الله
اسلوب سردي كوميدي تراجيدي رائع
أنا حسيت اننا اللي عملت العملة
والله ما ببالغ
ربنا يكرمك

Moustafa` يقول...

السلام عليكم
.....
انا على فكره
ربنا وحده عالم قد ايه القصه الصغنطوطه دى عملت فيا ايه
انا كنت زهقان جدا ودى طور من أطوار حياتى لازم يجى وبياخد حبه وقت كده وبعدين ينتهى
المهم اقدر اقول المره دى انا كنت عمله يومين كمان بس الحمد لله انتهى قبل ما يبتدى
ربنا يجازيك خير
.....
بموووت ف حاجه اسمها طفوله
ويخربيت جمال الألفاظ
حاسس انى فى برنامج اطفال بتاع حدوته كل يوم
بجد والله حضرتك تنفعى تقدمى برامج اطفال زى ده
لانك ببساطه (طفله فعلا)لا مؤاخذه بس ده شئ جميل
لأ بجد لسه ما تلوثتيش م الدنيا ..ويااااه على كميه البراءه اللى جواكى
بتفكرينى بإنسانه عزيزه عليا جدا
المهم استمرى وخليكى ع البراءه والتقائيه دوول
هما طريقك لقلوب الناس وطريقك لبقائك نقيه وطاهره فى دنيا البشر
واشكريلى والدتك جدا جدا
لانها مربيه فاضله جدا ونجحت فى رسالتها ربنا يجازيها عنكوا كل خير
أما عن الخاطره ولا القصه دى...
فمافيش كلام اقدر اقوله غير
انها جميله ومعبره جدا
صعبان عيلا اعدى قصه من غير نقد ادبى بس هيا جميله
سلاموووو
ومستنى جديدك

Unknown يقول...

ربنا يبارك في حضرتيك فعلا موقف حكيم لان اللي اعرفوا ان من احسن الطرق في تعليم الاولاد الحيل بس انتوا عندكم بيت ديمقراطي عكسنا تماما نظام قهري قمعي يعني اي مصيبه كانت تحصل كنا بنتعلق انا واخويا بغض النظر عن اللي عملها فمفيش داعي اصلا للكدب لانهم عندنا مبيسألوش اعدام علي طول
وجزاكم الله خير لان بجد الحكايه دي عجبتني جدا

فرنسا هانم يقول...

طيب يا هايدى
حاولى ترسمى على لوح بدل المرايات
واكيد انك رسامه بدليل ان مامتك سابت الرسم فتره طويله

islam يقول...

هايدى
السلام عليكم ورحمة الله وبركاته

ما شاء الله لا قوة إلا بالله
بالفعل ربنا يخلى ليكوا ماما لأنها جميلة بالفعل ، على الأقل بتحاول تخليكوا تحافظوا على الصلاة من صغركم

بس يا ترى الكرسى ده شكله إيه ؟

أنا كنت عمال أضحك وانا أقرأ ، والدنيا دواير بتلف

السلام عليكم ورحمة الله وبركاته

غير معرف يقول...

salam 3alikoum ya haidi

7elwa awey el 9esa bta3tek mottet me el de7k 3ala da7'alt fe el tv enty moseba be gaadd

rabena ye7'alilik mama ya rab

salam , donya

Unknown يقول...

ست الكل هايدي
ايه ده
انت مش بس فنانة
ده انت فظيعة خالص في الحكي
موضوع كرسي الاعتراف ده رهيب،
اقوك على حاجة .. احسن حاجة في الولاد والبنات الشقاوة
بجد بجد ، البنت مع مكياج مامتها والولد مع مكنة حلاقة باباه
مش عاوز اقولك
من زماااااااااان ما لقتش حد بيحكي كده
شفتي بقى افتكرتي انت كمان اتفاصيل الجميلة بتاعتك ازاي
اكرسي
فيلم الكرتون
المرايا
الشجرة ع الورق
تسلم ايديكي يارب
خلتيني اموت م الضحك

Ahmed Al-Sabbagh يقول...

جميل اوى يا هايدى

بجد وحشتينا

بجد عجبنى اوى كرسى الاعتراف ده

وياريت ما تتأخريش عننا كدة تانى

بجد والله كتاباتك وتعليقاتك اصبحت وجبة يومية الواحد ما يقدرش يستغنى عنها

تحياتى

NIDAAL .R يقول...

ماشى يا ستى .. ارسم هنا
بس انا نسيت القلم
المهم :
هذه اول مرة ادخل فيها لمدونتك
الرائعة الجميلة و بصراحة انا ما قريت كل المواضيع بس كفاية الشوية الى قريتهم
.......
تكفى رهبة كرسى الاعتراف للاعتراف
المؤثرات الخارجية هى ما تجعل الانسان يقر بذنبه او لا
و تدوينة كووووووووول اوى
و خاصة ادمان افلام الكرتون
مهما الواحد كبر بيفضل برده يحب يتفرج على افلام الكارتون
عن حالى بحب توم و جيرى القديم
...
بارك الله فيكى
juba02

mohamed sobhy يقول...

بيتباع الكرسي ده
وصيلي على الكميه اللي في السوق كله عشان ابعتها هديه لحكامنا من حكومه و رئاسيه و مجلس شعب ووزراء
ده احنا هنضحك ضوحك

غير معرف يقول...

masha2 ala 7elwo awi ya haidi topic ( korsy el 2e3teraf ) !!!!!

أبوسويلم يقول...

عجبنى جدا كلامك لدرجة انى قرات التدوينة لاخرها بالرغم من انها طويلة شوية بالنسبة ليا
لكن اسلوبك جميل للغاية والحكاية كمان مشوقة
ربنا يبارك فى اسرتك كلها
ما عادش اسر كتير بتهتم بالصلاة والامور الدينية بنفس اهتمامكم بها
تدوينة جميلة جدا بدون مجاملة
لكن ليا سؤال بسيط
ايه موضوع التوائم فى بيتكم؟
تحياتى
والسلام

غير معرف يقول...

دودو .. تعرفى ماكنتش اعرف انك بتكتبى بالطريقة الحلوة دى ايه يابنتى الجمال ده بس بتخيل شكل نادو وهيه عاملة زي الكتكوت المبلول فى وسطيكم . عجبتنى المدونة بتاعتك اوى ياهايدى وح احاول اتابعها دايما بتمنالك التوفيق وربنا يزيدك ايمان ياحبيبتي وتحياتي لماما ربنا يخليهالكم سلالالالالالالالالام

غير معرف يقول...

بصراحه يعنى انا وبقرى البوست انفجرت من الضحك كتير ومن قلبى كمان
بس بجد ربنا يخلى ليكم والدتك ويخليكم ليها

kafrawy يقول...

ههههههههههه

ممكن اعرف الكرسى دة منين

نفسى اجيب واحد لامى

samo يقول...

تعفى انى قريت الموضوع مرتين
ليه؟؟
عجبنى بس كده

دايما فى جزء مننا مختفى عن الناس وساعات كتير عن انفسنا كمان

وموضوعك اتحدى انه فكرنا بحاجات واخطاء كتير نسيناها

كرسى الاعتراف ؟؟؟

ياترى انتى دلوقتى لما بتنظرى للكرسى ده ايه اول افكارك ؟؟
انتى كسى الاعتراف ممكن يمثلك الجزء الغير معرف من حياتك

انا مثلا لما احب اتكلم وافضفض لحد احب اقعد قدام المرايا لوحد واتكلم

بجد موضوعك اثر فيا كتير
وشكلى هعملى كرسى اعتراف انا كمان

اشكرى والدتك كتير وحبيها اكتر لانه من الواضح انها بتحبكم كتير اوى

سلام واستمرى فى الابداع

Unknown يقول...

هو انا جيت متأخر ولا ايه معلش يا هايدي
بس ايه الكرسي الجميل ده
ياريت تبعتيهولي
انا عندي ولاد اختي جابولي تخلف عقلي
عايزالهم كرسي كهربا
تصبحي علي خير يا جميله

غير معرف يقول...

الله عليكى ياهايدى ذكريات الطفولة بتكون جميلة اوى وبنحب دايما نسترجعها من وقت للتاني جميلة ياهايدى والاجمل مامتك ربنا يخليهالكم ويزيدها
محبتى ... علا

ارسم بالرصاص يقول...

امري .. السلام عليكم ورحمة الله وبركاته اهلا وسهلا بيك في مدونتي ..

كويس ان الكرسي عجبك .. ده صناعة محلية .. عملو عم احمد الشواتفي ..

متشكرة اوي لزيارتك ..

بارك الله فيك وأعزك وأكرمك

هايدي

ارسم بالرصاص يقول...

عصفور المدينة وعليكم السلام ورحمة الله وبركاته .. اهلا وسهلا بيك .. وشكرا جزيلا على زيارتك وان شاء الله تتكرر

ياريت تجرب مشروع الكرسي ده اكيد ح يجيب نتيجة كويسة اوي مع ولاد حضرتك ..

يمكن تتولى تعميم الفكرة بعد كده ويبقى مشروع كرسي لكل بيت

بارك الله فيك وجزاك كل خير

ارسم بالرصاص يقول...

اكرمك الله ياهمسة قلم وجزاك الله كل خير

واهلا وسهلا بيكي دايما ويارب تكون ليكي زيارات متكررة للبلوج

ومتشكرة جدا على كلامك وتعلقك الجميل
ده ..
وأتمنى دايما تعجبك موضوعات المدونة بتاعتي .. وبارك الله فيكي وجزاك كل خير

هايدي

ارسم بالرصاص يقول...

دكتور البيروني

اهلا وسهلا بيك في مدونتي سعيدة ان البوست عجبك

ع فكرة الكرسي ده مافيش حد يفكر فيه الا لما يحس انه عامل عملة .. ياه كنا اطفال ورغم كده كنا بنحس بالذنب ونقلق لما نعمل حاجة غلط

اشكرك جزيلا على زيارتك واتمنى تتكرر

بارك الله فيك

ارسم بالرصاص يقول...

ساجي .. وعليكم السلام ورحمة الله وبركاته ..

بداية شفاك الله وعفاك من كل سوء .. ومتشكرة جدا على تعليقك الجميل ده .. جزاك ربي كل خير ..

وح ابلغ ماما كلامك عنها وربنا يكرمك ويبارك لنا ف امهاتنا .. انا بعتبرها كل حياتي وبدعو رب العالمين ترضى عني دايما ..

تفتكر يقبلوني مذيعة برامج اطفال وأنا بالفلح ده .. انت ناسي ولا ايه .. في شروط لابد من توافرها واولها انها تكون ع الموضة مش زي حضرتي جاية من الغيط عدل

ساجي انت نورت المدونة وفعلا بيسعدني جدا تعليقك ..اعزك الله واكرمك ..

ارسم بالرصاص يقول...

الفاتح الجعفري
ويبارك فيك .. اهلا وسهلا بيك في مدونتي سعيدة جدا بتشريفك لي بالزيارة .

ومعليش بيت دكتاتوري او ديمقراطي المهم انو ماشاء الله ولا قوة الا بالله طلعو منك شاب مسلم يعرف دينو

وفقك الله واكرمك واعزك

Ahmed Al-Sabbagh يقول...

هايدى ازيك فينك

انا حبيت اسلم واتطمن

تحياتى

ارسم بالرصاص يقول...

اسلام .. وعليكم السلام ورحمة الله وبركاته

اهلا وسعلا بيك نورت البلوج .. سعيد انه البوست عجبك

بالفعل ماما انسانة فريدة ربنا يخليهالنا يارب ويكرمها .. ويشفيها يارب

الكرسي ده شكلو عارف عامل ازاي فعلا قريب الشبه من الكرسي اللي انا عارضاه لكن متنجد وتحس كأنو ح يتكلم

اشكر يااسلام على زيارتك اعزك الله واكرمك

ارسم بالرصاص يقول...

فرنسا هانم .. اهلا اهلا وسهلا

ح احاول اعمل بنصيحتك بس والله يافرنسا الرسم لما بيكون على الاماكن الغريبة بيحلا اوي .. متلا ع الحيطان .. ممممممم على الكراسي ع المكتب .. كده يعني .. ساعتها الواحد يعمل نفسو بيكاسو وينكش شعرو ويقول ياجماعة انا فنان والفنون جنون ...

ربنا يكرمك يافرنسا ومتشكرة اوي لزيارتك الجميلة دي

تحياتي ليكي .. هايدي

ارسم بالرصاص يقول...

عمر افندي وابوه .. اهلا وسهلا بيك ولو اني كنت اتمنى تقول حتى السلام عليكم .. عموما دعوة مقبولة وان شاء الله احاول ازور مدونتك ..

ارسم بالرصاص يقول...

صديقتي دنيا .. اهلا وسهلا بيكي .. متشكرة اوي لزيارتك ونفسي ازورك ف مدونتك انتي كمان .. يلا يابنتي اعملي واحدة وح اكون ان شاء الله اول الزوار فيها .. اعزك الله واكرمك

ارسم بالرصاص يقول...

عمو احمد .. اهلا اهلا وسهلا بيك .. كلامك ده ماتتصورش فرحني اد ايه .. ده ح اعتبره وسام او شهادة تقدير .. ربنا يكرمك يارب ..

تعرف انا فعلا كنت بنت شقية اوي .. وخصوصا ان عندي اخت توأم كنا بنشج بعض اوي اوي وكنا محترفين مقالب .. ح ابقى انزل بلوج عن حكاياتي انا واختي ..

متشكرة اوي ياعمو على زيارتك الجميلة دي وربنا مايحرمني ابدا منها ..

بارك الله فيك واعزك واكرمك .. بنتك هايدي

ارسم بالرصاص يقول...

استاذ احمد .. اهلا وسهلا بيك منورنا .. ربنا يكرمك ومايحرمناش من سؤالك .. متشكرة جدا والله على اهتمامك .. كرسي الاعتراف ده كان زي الفلكة بس دي فلكة نفسية ..
ــــــــــ

والله يااستاذ احمد وزياراتك وتعليقاتك لاغني لنا عنها .. بصراحة بشوفك بتعمل دورات مكوكية ف كل البلوجات وبتدخل الألفة والسرور على قلوب الجميع

جزاك الله كل خير عنا واكرمك الله واعزك

تحياتي .. هايدي

ارسم بالرصاص يقول...

نضال .. اهلا بيك ومشكور ع الزيارة .. ويارب يكون كرسي الاعتراف عجبك ..

وان شاء الله تكون زياراتك متكررة للمدونة لتبادل الاراء والثقافات

تحياتي ليك .. هايدي

ارسم بالرصاص يقول...

محمد .. الكرسي ده مابيخلاش منه بيت .. بيتباع احتمال بس المشكلة مش من فين اشتريه المشكلة ف اللي يقدر على اللي بعد شراه ..

اظن اقتراحك ده عارف لو فرقت الكرسي ده ببلاش وفوقه موبيليا فاخرة لشقة كاملة برضو مش ح يشتروه ..

استاذ محمد حضرتك نورتنا وان شاء الله تتكرر الزيارة .. جزاك الله خير

NIDAAL .R يقول...

سلام عليكم / هايدى
اومال فين جديدك
اتمنى ان تكونى بخير حال
بارك الله فيكى

ارسم بالرصاص يقول...

سمراء .. اهلين وسهلين منورانا ازيك ياامورة وحشتيني اوي ..

متشكرة اوي على زيارتك الجميلة دي وياستي نادو مش غلبانة اوي كده ماانتي عرفاها دي بس كفاية تشغل الزنانة .. تعرفي انها فرحانة اوي انك بتدافعي عنها ..

اهلا بيك سمرا وخلينا نشوفك دايما .. سلام حبيبتي

ارسم بالرصاص يقول...

رئيس جمهورية نفسي .. اهلا وسهلا بيك نورت البلوج .. ربنا يكرمك وجزاك الله كل خير

سعيدة ان البوست ادخل على قلوب الجميع البسمة .. واشكرك على تعليقك ويارب يدوم التواصل وتبادل الاراء والثقافات بينا جميعا

تحياتي .. هايدي

ارسم بالرصاص يقول...

كفراوي .. اهلا وسهلا بيك .. شكلك كده بتعمل في مامتك اللي احنا كنا بتعملو فيها .. على فكرة هي ماما تلقيها عندها كرسي بس مش عايزة ترعبك وتقعدك عليه .. فانت خدها من اصيرها بدل ماتطلعهولك وتقعدك عليه .. اسألني انا ح تحس بفزع داخلي غريب .. كأنك عامل عملة ...

حضرتك نورتنا ياريت تتكرر الزيارات تحياتي هايدي

مؤمنه يقول...

السلام عليكم ورحمة الله وبركاته
ابقاها الله لك والدتك
واتلحصيله كما نراها مدونه متميزه اذا فلابد أن يكون وراء ذلك النجاح أم عظيمه
والسلام عليكم ورحمة الله وبركاته

ارسم بالرصاص يقول...

سامو السلام عليكم ورحمة الله وبركاته .. سعيد جدا انو البوست حاز اعجابكم .. هي فعلا فرصة الواحد يدور جواه واكيد ح يلاقي كتير ..

فكرة المرايا دي ظريفة اهو ع الاقل الانسان ح يواجه نفسو صح وح تكون فرصة حلوة انو يحكي بشكل اصرح ..

تعرف لما بشوف كرسي الاعتراف دلوقتي بقوله .. انا كنت بخاف منك اوي زمان وكنت فاكرة انو عندك ايدين كبيرة اوي واني لو كدبت ح تمسكني بالجامد اوي ومش ح تسيبني ابدا ..

سامو .. يلا اعملك كرسي اعتراف وياريت تحكيلنا اخبارك معاه في بوست جديد في مدونتك ..

فعلا انا دايما بشكر ماما وبدين لها بالطبع بعد رب العزة بالشكر والعرفان وانو مهما عملت مش ح اوفيها حقها

اشكرك ياسامو وجزاك الله كل خير

ارسم بالرصاص يقول...

ايمي اهلا اهلا فينك يابنتي .. انتي تيجي ف اي وقت يعجبك دايما اهلا بيكي

ايمي الكرسي ده له مفعول السحر بس المهم تكوني مقنعة اوي مع بنات اختك . وبعدين تعرفي زمان كان بيقولو الاطفال احباب الله .. يظهر يابنتي ف زماننا ده اصبح الكبار هما اللي غلابة معاهم .. ربنا يخليلك ولاد اختك ويبارك فيهم ويجعلهم الذرية الصالحة

ارسم بالرصاص يقول...

علا اهلا بيكي ياحبيبتي ومتشكرة اوي على اهتمامك وزيارتك الجميلة دي .. ربنا مايحرمنيش منك يارب

ارسم بالرصاص يقول...

استاذ احمد الصباغ

ربنا يخليك ويكرمك متشكرة جدا على سؤالك .. جزاك الله كل خير

انا موجودة دايما بس الدراسة ساعات تاخدني

بحاول اتواجد اد مابقدر .. شكرا فعلا على سؤالك تحياتي ليك .. هايدي

ارسم بالرصاص يقول...

نضال .. اهلا وسهلا بيك ..

متشكرة اوي على سؤالك .. انا موجودة وان شاء الله ح انزل بوست جديد قريب اوي

بانتظار تواجدك معنا .. تحياتي ليك

هايدي

ارسم بالرصاص يقول...

Anonymous said...
masha2 ala 7elwo awi ya haidi topic ( korsy el 2e3teraf ) !!!!!

.. السلام عليكم ورحمة الله وبركاته ..

داليا العزيزة جدا أنا اسفة والله .. متشكرة اوي ياداليا على زيارتك للبلوج بتاعي وجزاك الله كل خير ..

داليا دي ياجماعة زميلتي ف الاكاديمية وصديقة عزيزة .. اعزك الله واكرمك .. تحياتي ليكي .. هايدي

ارسم بالرصاص يقول...

مؤمنة السلام عليكم ورحمة الله وبركاته

اهلا وسهلا بيكي وجزاك الله كل خير .. يسعدني ويشرفني رأيك في مدونتي .. ويارب يدوم بينا التواصل دايما .

ح اوصل لماما كلامك ده .. واكيد ح يسعدها جدا .. ربنا يخليكي ويبارك فيكي .

تحياتي ليكي يااختي في الله

Mo3Az يقول...

:)

اسلوب قصصى جميل
ما حسيتش بالوقت وانا بقرأ البوست مع انه طويل

موضوع جميل
تسلم ايدك
(F)

NIDAAL .R يقول...

خبر عاجل : ياريت تنشريه
اتصلت بايمان بدوى احدى الناشطات المشاركات فى قافلة رفح
و قالتلى ان الشرطة منعاهم يدخلوا العريش و اتفتشوا اكثر من 5 مرات تفتيش دقيق حتى الاكياس بتتفتش
و الشباب المشاركين عملوا مظاهرة
على الطريق .. و مخنوقين على الاخر و ممكن يرتكبوا جناية مع الشرطة
ربنا يستر الوضع جد خطير

سلوى يقول...

أسلوبك جميل يا هايدي

ربنا يوفقك

وحكايه كرسي الإعتراف ده جامده جدا

ربنا يخلي مامتك ويبارك لها فيكم
بلغيها تحياتي

وأشكرك على زيارتك لمدونتي
أنتي نورتيها

خالص تحياااااتي

احساس لسه حى يقول...

700عزيزتى
شوفى لازم نعلم اولاتدنا ازاى يكون صادقيين بقدر المستطاع بس مش بالتخويف بالضرب والكلام ده بس لازم نبتكر اشياء كتيره اوى
وموضوع كرسى الاعتراف ده سمعت عنه كوسيله للتربيه المظبوطه
ربنا يخليها لانها حابه تعودكم على العبادات
تحياتى ليها
سلام

غير معرف يقول...

الله عليكى .. موضوع جميل جدا

بارك الله فيكى ياهايدى وربنا يبارك لكم فى والدتكم \\\

فى انتظار موضوعك الجديد

ارسم بالرصاص يقول...

معاذ .. اهلا وسهلا بيك شرفتني حضرتك .. ومتشكرة جدا لاطراءك وفي انتظار زياراتك جزاك الله خيرا

ارسم بالرصاص يقول...

نضال .. اهلا بيك .. فعلا خبر محزن واسأل الله العلي العظيم رب العرش العظيم ان يفرج كربتهم .. فعلا سمعت الخبر من الجزيرة .. ربنا يستر

ارسم بالرصاص يقول...

سلوى .. اهلا بيكي حبيبتي .. ربي يديم التواصل بينا .. متشكرة اوي على كلامك الجميل ده .. ومبسوطة انو عجبك الكرسي .. ح ابلغ الوالدة تحياتك .. جزاك الله كل خير .. وان شاء الله نكون دايما على اتصال

ارسم بالرصاص يقول...

احساس لسه حي .. اهلا بيك فعلا هي الاساليب التربوية لابد وانها تكون بالاقناع والحيلة مش بالضرب ..وفعلا احنا محتاجين نتربى على العادات الاسلامية الصحيحة .. هي والدتي اد ماهي حازمة لكن نادر جدا لو ضربت حد من اخواتي .. متشكرة اوي على زيارتك وجزاك الله كل خير

ارسم بالرصاص يقول...

سلمى .. وفيك ومتشكرة جدا على زيارتك اللي اتمنى انها تكون دائمة وتحياتي ليك .. جزاك الله خيرا

عمر محمود يقول...

طفولة جميلة وكرسى أجمل وربنا ما يحرمكو من بعض
وعندى لكم رحلة لرفح
http://yalaya3mlak.blogspot.com/2007/12/blog-post.html

قضية عم أحمد Ahmed Case يقول...

بصى يا هايدي انا جاي المدونة ديه ع السمعة
بصراحة فطست على روحي من الضخك وايه الصورة الوهم اللى انت حطاها ديه ..

بوست رائع وقصة دمها خفيف وصورة جميلة
تسلم عين اللى قرأه

دكتور حر يقول...

هايدي
في موضوع جديد
يا ريت تشوفيه

لك تحياتي

Moustafa` يقول...

اشكوكى لقرائك الكثيرين بسم الله ما شاء الله
ربنا يزيدك
بجد عايزين موضوع
فى مظاهره برا بتطالب بعوده العضوه هايدى الى القلم والكتابه وامتاعنا بجد
محتاجبن موضوع
ع العموم ربنا يوفقك ف المذاكره
مش عايزن نعطلك
بس بنقلك وحشتنا موضوعاتك بجد
سلاموو أيتها الرفيقه
السلام عليكم ورحمه الله وبركاته

سلوى يقول...

هايدي

دي مدونه جديده .. شرفينا بقى

http://kalamalbanat.blogspot.com/

media يقول...

حلوة اوي حكايتة الكرسي دي هبقى اعملها مع ولادي ان شاء الله

اسلوب حلو في التربية

ربنا يخليكوا لمامتكم ويخلهالكم

ارسم بالرصاص يقول...

عمر محمود اهلا وسهلا بيك في مدونتي وجزاك الله خير وان شاء الله اروح ع الرحلة واقولك .. ف آخر الرحلة مدى الفايدة المتحققة منها .. تحياتي ليك واكرمك الله واعزك

Ahmed Al-Sabbagh يقول...

انا عديت اسلم لقيت نفس البوست

انا عارف انك مشغولة بالدراسة

بس الله يكرمك ابقى طمنينا حتى لو ببوست صغنون عشان البلوجرية كلهم بيفتقدوكى

صدقينى مش كلام

مدونتك ركن مهم اوى لناس كتير بيعدو عليه كل يوم

وربنا يكرمك ويوفقك فى الدراسة

تحياتى

ارسم بالرصاص يقول...

أستاذ أحمد رفعت

الله يكرمك يارب ومتشكرة جدا على الكومنت الجميل ده بارك الله فيك وسعيدة جدا انو البوست عجبك ويارب كل بوست احطه يحوز اعجابك

تحياتي هايدي

ارسم بالرصاص يقول...

دكتور حر أنا بعتذر لك بشدة عن التأخير لكن ان شاء الله ح اشوف الموضوع .. وعارفة من قبل ماازوره انه اكيد حلو جدا .. لانو حضرتك اللي كاتبو .. وانت موضوعاتك هادفة جدا .. اكرمك الله

هايدي

ارسم بالرصاص يقول...

ساجي .. السلام عليكم ورحمة الله وبركاته وأهلا بيك دايما اخي الكريم .. سعيدة جدا بزيارتك الجميلة دي .. وطبعا طلبك ع الراس .. بص فوق ح تلاقي بوست جديد .. ح استنى فعلا رأيك فيه لانه يهمني نقاش هذا الموضوع جدا .. اكرمك الله واعزك يااخي

وتحياتي ليك .. هايدي

ارسم بالرصاص يقول...

سلوى .. من عيوني حاضر ..

ح ازورها واكيد حلوة زي حلاوة روحك

تحياتي ليكي .. هايدي

ارسم بالرصاص يقول...

لولا .. اهلا وسهلا بيكي ف اول زيارة ليكي معانا في البلوج ويارب تكون دايما .. اشكرك جزيلا على هذا الاهتمام

ومن الرائع ان البوست يعجبك .. هي طريقة رائعة بالفعل بس مع اطفال الكمبيوتر والنت الله اعلم ح تكون ايه ؟؟؟

تحياتي ليكي ونورتينا

هايدي

ارسم بالرصاص يقول...

أستاذ أحمد الصباغ

ياأهلا وسهلا بيك نورتني والله وربنا يكرمك على زياراتك الجميلة دي وسؤالك الدائم جزاك الله كل خير ...

ان شاء الله ح تلقى بوست جديد لو بصيت اعلى .. وعليه اهداء لأخ وصديق وأستاذ اكرمني بزيارته ومتابعته للبلوج وللموضوعات فيه ..

جزاك الله كل خير عني .. وتحياتي ليك

هايدي