حرية على الموضة

Draw Your Own Picture

السلام عليكم ورحمة الله وبركاته يمكن عنوان البوست غريب شوية بس اصبروا عليا وأنا ح أفهمكم ... جاه منين ؟؟؟ ماهو كل حاجة في الدنيا دلوقتي ماشية ع الموضة واللي مايمشيش ع الموضة والروشنة يبقى حاجة كده ف الخيابة والفلحنة سبحان الله ... لما كنت في المدرسة كنت بقول امتى أخلص من أيامها وأروح ع الجامعة !! ... أصلو سمعت إن الناس فيها عقلها بيكبر وتفكيرها بيوسع ..وكنت بمني نفسي .. إني ح أخلص من تعليقات زميلاتي في الفصل والمدرسة عن ... ايه اللي انتي لابساه ده ياهايدي ؟؟إيه تفكيرك المقفل ده ياهايدي ؟ انتي بنت متخلفة ياهايدي .. إيه يعني لما نخرج كلنا كده جروب مع بعض !! نتمشى ونروح أي كافيه .. ولا حتى نروح سينما وإيه يعني لما نرجع متأخرين طالما كلنا مع بعض يابنتي انتي كبرتي .. سيبك من موال بابي ومامي ده وبعدين يعني ايه لزقتك المنيلة دي مع مامتك هو لازم تروحي تدلؤيلها كل اللي عملتيه ف المدرسة ؟؟؟؟؟؟؟؟؟يابنتي اكبري .......................لازم تكون عندك أسرارك وحياتك الخاصة وبعدين معقول .. بنت طويلة عريضة زيك .. معهاش موبايل ؟؟؟؟؟؟؟؟؟؟؟؟؟؟؟؟يعني ايه مش محتاجاه ؟؟ في بنت ف الدنيا ماتحتاجش موبايل ؟؟؟ أمال الرنات والماسجات اتعملت عشان مين ؟؟ بصراحة وم الآخر كده .... انتي بنت خنيء .. خنييييييييييييء كنت بسمع كلامهم ومن باب احترام آراء الآخرين ... في البداية كنت بأناقشهم كتير أوي ومرات كنت بأتطرق لأسلوب تفكيرهم في محاولات فاشلة لفهمهم .. أو لتوضيح الأمور وإيجاد نوع من التواصل وكل نقاش كانوا بيختموه بجملة مافيش غيرها " يابنتي احنا ف بلد الحرية وف زمن الحرية " وبرضو فكرت كتير أوي ... ف معنى الجملة دي وماقدرتش أربط بين الحرية وبين اللي بيقولوه أو بيعملوه ماعلينا المهم إني كنت بأمني نفسي إن ف الجامعة الموضوع كله ح يختلف .. لكن للأسف نسيت موضوع مهم جداً .. إن زميلاتي ف المدرسة وف الفصل هما نفسهم أو زيهم اللي ح يكونوا معايا ف الجامعة .. واللي زاد الطين بلة .. موال الاختلاط مع الشباب .. وتفسير الطرفين لفكرة الاختلاط دي بصراحة يعني .. لقيت العملية أنيل بكتير .. للأمانة ومن باب الحياد لقيت أن الولاد حصلت لهم حالة استسلام غريبة للأمر الواقع ... ولفكرة أن كل البنات زي بعض .. وان كله رسم ف رسم دي بترسم الأدب ... ودي بترسم التؤل ... ودي بترسم التدين ووووووووووووووو المهم .. طبعاً موال التعليم والغرض من المرواح للجامعة من أصلو مفقود مفقود ياولدي أو تقدروا تقولوا مدفون .. أو ميت ... أو قتيل ... أو محروق بجاز .... ماعلينا وطبعاً سمعت نفس التعليقات اللي كنت بسمعها من زميلاتي بس المرة دي من العيار التقيل .. آخرهم تعليق عجبني أوي ... واحدة سألتني هو انتي ياهايدي م سكان قاهرة المعز لدين الله الفاطمي ؟؟؟ يعني عايشة ف القاهرة ؟؟وكأني بأروح الكلية راكبة جمل !!!!! هو انتي جيتي الكلية هنا .. منحة ؟؟ ههههه تبرع يعني من عباد الله الطيبين وياسلام لما عرفت ان أختي بتدرس ف الـ GUC...كانت أكبر مفاجأة ليها وكأنها شافت المعجزة التامنة ... وبحلئتلي شوية ... وووووو أختك خدتها منحة ؟؟؟ اصلو يعني معقول انتو يعني .. ولامؤاخذةبمنظرك الفلح ده .. عندكو فلوس تدخلوها هناك ؟؟ فيعني أنا ولا مؤاخذة ... ومن باب برضو الحرية اللي معلقين فيها قلت أفهم يعني إيه منظري الفلح ؟؟؟ سألتها كده على استحياء .. خفت لاسمح الله تتهمني بالغباء .. كمان بصتلي من فوق لتحت كده .. لا من تحت لفوق وقالت لي ... يابنتي ..انتي مش شايفة انتي لابسة ازاي ؟؟؟؟قلتلها : ازاي ؟؟؟ قالتي : في حد ابن ناس ... ف زمن الحريات والعولمة والانترنت يلبس لبسك ده بصراحة وإحقاقاً للحق مافهمتش ايه علاقة لبسي بالحرية والعولمة والانترنت ؟؟؟ بس برضو احقاقاً للحق ... تقدروا تقولوا عليا غبية لأنو رغم انها تعبت نفسها وشرحتلي ... إلا إني مازلت مش فاهمة و...عجبي ......................... وتصبحو على خير