ياما في الجراب ياحاوي ... !!!!

سكند لايف ... اضغط هنا

تؤ تؤ تؤ .....



السلام عليكم ورحمة الله وبركاته

كيف حالكم ياجماعة ؟؟ أسأل الله العليّ القدير أن تكونوا بأتم صحة وأسعد حال

ــــــــــــــــــــــــــ

البوست ده إهداء للأستاذ / أحمد الصباغ صاحب مدونة خالو أحمد


شكر ليه على مؤازرته المستمرة ليا .. واستكمالاً لموضوع كتبه بعنوان

طمـــوح إلكترونى

شخشخ الكى بورد يا سيد


قولوا بسم الله


حد منكم فكر كده لو اتيحت له فرصة إنه يعيش ف عالم آخر ... ح يعمل إيه ؟؟؟

ناس كتير اتيحت لهم الفرصة دي ... حتى أنا كماااااااااان !!!!!!

يم يم يم يم

بس بس استنوا عليا ... قبل مايوصل لدماغكوا استنتاجات مش ( صح ) عني

ح احكيلكم اللي حصل ... بس لازم تقولوا لي رأيكم ف اللي ح تسمعوه ...

سواء اتفقتوا معايا أو اختلفتوا .... ماشي ؟؟؟؟

ـــــــــــــــــــــــــــــ

ياجماعة أنا كنت قاعدة ف أمان ربنا ومش على بالي حاجة ...

جات واحدة جارتنا ... تزورنا

وبعد السلامات والترحيب .. قعدنا ناخد و ندي في الكلام

كلمة من هنا وكلمة من هناك .. شفتوا سايت الفيس بوك ... ؟؟

شفتوا مجاميع الكليات السنة دي وصلت للسما ازاي ؟؟ تعرفوا صاحبتي جابت 97% ماجالهاش اي حاجة الا تجارة ..

ااااه استنوا استنوا انا ح احكيلكوا عن موضوع قنبلة ...

سمعتوا عن حاجة اسمها العالم التاني ؟؟؟؟

أختي لأن دماغها كلها أحياء .. ومتنفسات ولعبكات علمية ..

قالت لها .... أصدك الجنس التاني والتالث ؟ ؟؟

لأ لأ ... ياسمر

طب أصدك فكرة الحياة على كوكب المريخ ... ولالالا ؟؟؟

يابنتي لأ ... أن بتكلم عن

Second life

الحياة الثانية .... لعبة ... لعبة اسمها كده

طبعاً إحنا عشان ماما دايما تقول .. اكبروا شوية

الكارتون والجيمز بيخربوا عقولكم وبيضيعوا وقتكم .. اللي ربنا ح يحاسبنا عليه ..

عملتوا بيه ايه ياحلوييييين ؟؟

حضراتنا طبعا رجعنا لورا كده .. وقلنا لها بـ ( تقل ) .. آآآآآآآآآه لعبة ةةةةةةةةةةة

بس برضو منظر البنت بان عليها إنها نفسها تحكيلنا .. أكيد الموضوع مهم

سألتها ... يعني لعبة كده زي توم رايدر .. وبرنس اف باريس ؟؟

قالت لأ لأ لأ

دي حاجة تانية خالص ...

قلنا نشنف آذاننا .. ونسمع

أهو من باب العلم بالشيء .. هاتي ماعندك ياشهرزاد ..

بصوا ياجماعة وباختصار كده ...

اللعبة دي ابتكرتها شركة ليندن لابس 2003

عبارة عن عالم افتراضي اشخاصه عاملين زي اللي موجودين ف الالعاب ثلاثية الابعاد

لكن الفارق ان الشخص يقدر يتفاعل ويتعارف ويعبر عن نفسه

ازاي ؟؟؟

يدخل يسجل على الموقع ويختار لنفسه اسم وشخصية والشكل اللي عايزه وكمان يلبس اللبس اللي عايزه

ويبتدي يتعلم المشي ثم الطيران ...

ويبتدي يدب ف أرضه ويدور على رزقه يشتغل ويكسب .. ويشتري البيت اللي هو عايزه لما يختار مكانه

وطبعا العالم ده ليه عملته الخاصة بيه الدولار ليندن

وكمان ليه اقتصاده الجبار وفي شركات ومؤسسات كبيرة من اللي ليها اسمها ف سوق الاقتصاد عاملة فروع هناك

عدد سكان العالم هناك اتعدو 3 ملايين نسمة افتراضيين ...

يم يم يم

... قلت أقوم ع الشبكة المعنكبة .. وأعمل بحث وأشوف ايه حكاية السكند لايف دي ؟؟

لقيت كلام البنت صحيح ..

لأ وكمان لقيت ان فكرة السكند لايف راجت ونجحت لدرجة انها امتدت من الأشخاص للوكالات ..

وكالة رويتر عاملة مكتب افتراضي هناك وكمان الاذاعة الاسترالية ..

واصبح هناك تمثيل دبلوماسي وسياسي .. تخيلو !!!!

جزر الملديف والسويد افتتحتا سفارتين افتراضين هناك

لأ وشوفوا كمان لما قلبت ف جراب الحاوي .. أصدي ف الشبكة المعنكبة

خبر بيتكلم عن الدعوة الإسلامية هناك .. في السكند لايف .. وان ليها نشاط

لدرجة وجود داعية إسلامي هناك لنشر الدعوة ..

وان فيه مسجد هناك للمسلمين الافتراضيين عشان يؤدوا فيه صلواتهم

لأ وشوفوا ... ثلاث مسيحيين أسلموا هناك وأشهروا اسلامهم داخل المسجد ونطقوا بالشهادة

لأ وايه كمان .. انتشرت هناك بين السكان الافتراضيين حاجة سماها العلماء النفسيين اسلاموفوبيا

يعني ايه ...؟؟ السكان هناك اصابتهم فوبيا .. من الاسلام والاسلاميين وتعرضوا للمسلمين هناك ..

بالسباب والشتائم ووصلوا لحد اغتصاب البنات المسلمات الافتراضيات هناك

خبر تاني قريتو وهو سقوط قنبلة ذرية على مبنى الاذاعة الاسترالية الافتراضية

وان جماعة سمت نفسها جماعة جيش تحرير سكند لايف الافتراضية أعلنت مسئوليتها عن الحادث

ولقيت .. ولقيت .. ولقيت

اشي تجارة واقتصاد وبيع عقارات وبيوت أزياء وموضة

وماعرفش ايه تاني ..

لأ وزاد وغطى .. البوست بتاع أستاذ أحمد الصباغ

قلت قبل ماعقلي يشط مني

أروح على أحبائي في الله سبحانه وتعالى

مين غيركم يلحقني وأحط كل تخريفاتي هنا

وأسيبكم انتو تردوا عليا

ياجماااااااااااااااااعة

أيهم أولى بالدعوة الإسلامية ونصرة الاسلام .. الحياة الأولى

حياتنا الحقيقية اللي عايشناها واللي ح نتحاسب عليها ...

ولا الحياة الافتراضية .. اللي أثبتت البحوث والدراسات النفسية

ان معظمهم بيكونوا أشخاص على غير حقيقتهم

وان لجوءهم للسكند لايف نوع من الهروب من حياتهم الحقيقية

وانهم بيعملوا تصرفات مش دايماً بتكون عكس تصرفاتهم

يعني مش الغير مسلم ح يستنى لما يروح السكند لايف عشان يسلم .... ؟؟؟

مش أحسن لو ... نكرس اهتمامنا بتقويم أنفسنا ومجتمعنا

واصلاح شأننا حتى نستطيع أن نكون حقاً ..

( أمة محمد صلى الله عليه وسلم ) ؟؟



ياجماعة ... طيب تفتكروا ده مش قمة تضييع الوقت ..

اللي رب العزة ح يحاسبنا عليه ويقولنا :

عملتوا ايه بوقتكم .. أنا خلقتكم لعبادتي وعمارة الأرض

طيب ايه من السببين دول حققناه في سكند لايف ؟؟


اللي أعلنوا إسلامهم في سكند لايف دول ياترى

كان تصرفهم حقيقي ولاكان افتراضي هو كمان ؟؟

اشمعنى يعني ح نهلل باسلامهم ونفرح ونفترض صدقه

في عالم كله مبني على الخيال والافتراض

وآخر تساؤل ليا وياريت ألقى حد يتبرع ويسألنا حد من علمائنا الأجلاء

إيه رأي الشرع في الحياة دي ؟ وهل الداعية فيها مأجور على عمله ؟

وهل الإسلام يشجع على مثل ذلك الأمر ؟

ولا إيه رأيكم ؟؟؟؟

في انتظاركم جميعاً ...

وياريت لو سمحتو اللي يضيف كومنت ..

يختار الاجابة المناسبة في الاستفتاء اللي في التول بار

ـــــــــــــــــــــــــــــــــــــــــــــــــــــــــــــــ

تحياتي للجميع

هايدي